Настани и новости

КОНКУРС за дизајн на промотивен материјал Ромскиот образовен фонд/Програма за стипендирање (РЕФ/ПС) објавува конкурс за дизајнирање на промотивен материјал за потребите на РЕФ/ПС. Право на аплицирање имаат сите поранешни или сегашни корисници на РЕФ/ПС, а предност ќе имаат оние кандидати кои се студенти или дипломирани на некој од факултетите за графички дизајн, информатички дизајн или други сродни области. Победникот ќе добие награда во висина од 300 евра, исто така неговиот/нејзиниот дизајн преку промотивниот материјал ќе биде промовиран и претставен на РМУСП/Програма за право и хуманистички науки. Награда во висина од 300 евра ќе биде доделена на кандидатот/ката кој/а ќе го освои првото место, Награда во висина од 200 евра ќе биде доделена на кандидатот/ката кој/а ќе го освои второто место, Награда во висина од 100 евра ќе биде доделена на кандидатот/ката кој/а ќе го освои третото место, Конкурсот е отворен за сите поранешни и сегашни стипендисти на Програмата за стипендирање. Пријава за учество на конкурсот може да поднесат поединци, и тимови (максимум 3 члена, еден од нив мора да е поранешен или сегашен стипендист на програмата за стипендирање на студенти Роми). Ве известуваме дека програмата ќе ги задржи авторските права и правото да ги промени материјалите според потребите на програмата. (Ве молиме да користите било која боја на постери, прифатливи се фотографии за кои има согласност од лицето кое се појавува во постерот). Ве молиме да имате предвид дека, нема да ви бидат вратени доставените материјали! Краен рок за пријавување е 15 Февруари 2010 Заинтересираните кандидатите треба да испратат детална биографија – CV на следнава e-mail адреса: ajsel.memet@soros.org.mk. Примерок од работниот материјал за дизајнирање ќе го најдете тука. Повеќе информации, ве молеме контајтирајте ја: Ајсел Мемет Проектен координатор, РМУСП е-mail: ajsel.memet@soros.org.mk Тел: 02 / 24444 88 лок. 107				ПРЕС-КОНФЕРЕНЦИЈА Четврти извештај од следењето на процесот на пристапување на Македонија во ЕУ ПРАВИ ЛИ ВЛАДАТА СПОМЕНИК ОД ЕУ? Македонскиот центар за европско образование (МЦЕО) и Фондацијата Институт отворено општество Македонија (ФИООМ), на денешната прес-конференција го објавија четвртиот квартален извештај од следењето на процесот на пристапување на Македонија во ЕУ. Извештајот претставува хоризонтален пресек на постигнувањата во процесот на евроинтеграцијата на Република Македонија, во периодот октомври- декември 2009 година. Анализата покажа дека Собранието на Република Македонија, во текот на 2009 година, донесе вкупно 184 закони, од кои само 49 се со „европско знаменце“ и се предвидени со Националната програма за преземање на европското законодавство (НПАА) за 2009 година, како и дека голем број закони се донесувани по двапати, односно 18 закони се менувани по два или три пати и Собранието за нив расправало дури 39 пати. Оваа бројка укажува на проблеми во работата на Собранието кога станува збор за донесувањето закони, и го наметнува прашањето за тоа дали пратениците си ја извршуваат доволно добро работата за која се избрани и платени од граѓаните. Прочитајте повеќе >>> Преземете го извештајот (.pdf 860KB)
ЕКТС - реалност или илузија во високото образование Младински образовен форум (МОФ), на 27 јануари 2010 година, ја промовираше брошурата „ЕКТС - реалност или илузија во високото образование“, во која се објавени резултатите од истражувањето за спроведувањето на Европскиот кредит трансфер систем (ЕКТС) во Македонија. Истражувањето покажа дека факултетите се на различен степен на имплементација на ЕКТС, во различните сегментии коишто ги опфаќа овој систем на образование. Во брошурата се содржани согледувања и препораки насочени кон: студентите, академскиот кадар, админстрацијата и менаџментот на високообразовните институции, државните органи и бизнис секторот. Со цел сублимирање на резултатите од истражувањето и давање на завршните препораки, МОФ го искористи искуството и упатеноста во областа на имплементацијата на ЕКТС на проф. д-р Зоран Поповски, професор на Факултетот за земјоделски науки и храна. Препораки се насочени кон поефикасна и поуспешна имплементација на ЕКТС, но воедно и кон подигнување на квалитетот на високото образование во Република Македонија воопшто. Високообразовните институции во Македонија започнаа да работат по ЕКТС од 2003 година врз основа на стандардите воспоставени со Болоњската декларација од 19 јуни 1999 година. Имплементацијата на системот од страна на факултетите се водеше различно. Оваа ситуација доведе до тоа да не постои стандардизиран систем на студирање, при што се доведе во прашање и квалитетот на дипломата која ја добиваат идните академски граѓани. Воедно, имплементацијата на ЕКТС досега не беше набљудувана или тестирана од ниту едно тело, односно релевантен субјект. Истражувањето се спроведе во рамките на проектот „Пристап до информации од јавен карактер“,во периодот од 1 април до 31 декември 2009 година. Во рамките на девет месечното истражување беа доставени вкупно 495 барања за пристап до информации од јавен карактер до шест факултети (Филозофски факултет - Скопје, Филолошки факултет “Блаже Конески” - Скопје, Правен факултет “Јустинијан Први” - Скопје, Економски факултет - Скопје, Архитектонски факултет - Скопје и Факултет за Електротехника и информатички технологии – Скопје) и до Студентскиот парламент на Универзитетот „Св. Кирил и Методиј“. Со овој проект се вршеше набљудување на спроведувањето на Законот за слободен пристап до информации од јавен карактер од страна на високообразовните институции, а со цел да се дојде до информации за тоа како се спроведува ЕКТС во областите: студентски права, факултетска администрација, финанси и студентска мобилност и мобилност на наставниот кадар. Преземете го пдф изданието на брошурата „ЕКТС - реалност или илузија во високото образование“ - 11MB				ТУЖБА ЗА КЛЕВЕТА Тужба за клевета против Драган Павловиќ – Латас заради наодите изнесени во написот „Грција ги плаќа нивните, а во Македонија своите новинари за да помине грчкиот предлог“ Денеска, 22 јануари 2010 година, до Основниот суд Скопје I беше поднесена тужба против уредникот во весникот „Вечер“, Драган Павловиќ – Латас. Тужбата ја поднесоа оштетените Никола Гелевски, Бранко Героски, Владимир Милчин, Ивица Антески, Маја Бојаџиевска, Џабир Дерала, Лидија Димова, Гордана Дувњак, Ѓунер Исмаил, Жарко Јордановски, Ема Марковска Милчин, Ида Протуѓер, Билјана Секуловска и Ерол Ризаов, по повод наодите изнесени во написот „Грција ги плаќа нивните, а во Македонија своите новинари за да помине грчкиот предлог“, објавен во „Вечер“ на 18 декември, 2009 година. Во тужбата се наведува дека во текстот во „Вечер“ се објавени невистини со цел да им се наштети на угледот и на честа на новинарите, интелектуалците и на претставниците на граѓанските здруженија што се споменуваат. Тужбата се поднесува против главниот и одговорен уредник Драган Павловиќ - Латас со оглед на тоа дека објавениот текст во „Вечер“ не е потпишан.
ДЕБАТА Втор ден од дебатата „Историја и апокрифи – демитологизација на 2001“ На вториот ден од дебатата „Историја и апокрифи – демитологизација на 2001“, учесниците дискутираа за улогата на медиумите во конфликтот 2001 година. Панелистите: Небојша Карапејовски од ТВ Менада - Тетово, Снежана Лупеска од Канал 5, Сашо Орданоски и Сефер Тахири од ТВ Алсат, дебатираа за тоа дали новинарите за време на судирот во 2001 година останаа на страната на фактите или пак, претставуваа продолжена рака на пропагандната машинерија, дали новинарите останаа професионални или пак, се однесуваа „патриотски и лојално“ кон една од двете страни на судирот и дали македонското новинарство е обучено и опремено за известување во ситуација на конфликти и воени кризи. Дводневната дебата заврши со сесијата: „Дали конфликтот е завршен? Дали помирувањето се случи? Дали последиците ги разрешуваат причините?“. Дискутантите: Стојанче Ангелов, здружение на бранители „Достоинство“, Виолета Петровска Бешка, Институт за психологија, Абедин Зумбери, пратеник од НД, Надица Мирчевска, поранешен претседател на здружение „Херои на Македонија“, Филип Петровски, Градска библиотека „Браќа Миладиновци“, Исмет Рамадани, Евро-Атлантски совет на Македонија, Бесим Хода, здружение на воени ветерани на поранешна ОНА и Еуген Јаковиќ, „Документ – Центар за соочување со минатото“, од Загреб, Хрватска, зборуваа за различни аспекти поврзани со помирувањето и заокружувањето на конфликтот. Се дискутираше за напорите на државата за решавање на конфликтот, за преговорите и нивната содржина, за жртвите за време на преговорите, за измените на Уставот, за демилитаризацијата на ОНА, за мисијата „Неопходна жетва“, за амнестијата и аболицијата, за киднапираните и жртвите на двете страни, како и за хашките случаи.				ДЕБАТА Прв ден од дебата „Историја и апокрифи – демитологизација на 2001“ Фондацијата Институт отворено општество - Македонија, во хотелот Холидеј Ин, во Скопје, денеска и утре (20 и 21 јануари 2010 година), организира дводневна дебата насловена како „Историја и апокрифи - демитологизација на 2001“. Основната идеја и цел на оваа дискусија е да ги вкрсти ставовите, мислењата, фактите и аргументите на: директните учесници, политичарите, аналитичарите, академската јавност и интелектуалците, за конфликтот во 2001 година. На првиот ден од дебатата, Виктор Габер, амбасадор во МНР, Манчо Митевски, уредник во „Утрински весник“, Ризван Сулејмани, Институт за политички и интеркултурни студии и Љубомир Фрчкоски, Правен факултет „Јустинијан Први“ се обидоа да дадат одговор на прашањето: „Дали ни е потребна демитологизација на 2001 година?“. Сите дискутанти се согласија дека демитологизацијата и демистификацијата на конфликтот во 2001 година е потребна. Според нив, потребно е време и политичка волја да се отворат сите прашања поврзани со конфликот и да се даде одговор на прашањето зошто ни се случи 2001 година. Еден дел од дискутантите се залагаат за правна разврска на споровите кои датираат од овој период, а речиси сите се согласија дека принципот на инклузивност на етничките заедници во општеството, кој е вграден во Рамковниот договор е лекцијата која Македонија ја научи и која је претвори од мултиетничко општество во мултиетничка држава. Затоа, тие истакнаа дека Рамковниот договор, како гарант за мирот и стабилноста на Македонија треба да се почитува и да се реализира. Дел од дискутантите зборувајќи за Рамковниот договор и за принципот на инклузивност истакнаа дека актуелната власт не го почитува овој документ и дека токму таквото однесување може повторно да ја донесе Македонија во криза. Бројните учесници на денешната дебата дискутираа и за различните верзии и видувања на клучните настани за време на конфликот во 2001 година (панелисти беа Рафис Аљити, потпретседател на Собранието на РМ, Владимир Бучковски пратеник на СДСМ, Марк Лејти, автор на книгата „Спречување војна во Македонија“ и Г’зим Острени, автор на книги), а имаа можост да ги слушнат и рецензиите на книгите кои се преведени и издадени од ФИООМ, во рамките на проектот „Историја и апокрифи – демитологизација на 2001“ (рецензенти беа: Билјана Ванковска, професор на Институтот за одбранбени и мировни студии, Ветон Љатифи, професор на УЈЕ, Мирјана Малеска, професор на УЈЕ, Мерсел Биљали, професор на ФОН, Сандра Исмановска, автор, Благоја Марковски, Балкански форум за безбедност). Дебатата продолжува утре (21 јануари 2010 година) со дискусија за улогата на медиумите во конфликтот, како и за тоа дали конфликтот е завршен, дали помирувањето се случи и дали последиците ги разрешуваат причините.
НАЈАВА ФИООМ организира дебата на тема „Историја и апокрифи - демитологизација на 2001“ Целта на дебатата е да се вкрстат погледите на, условно речено, двете страни, што беа дел од вооружениот конфликт во 2001 година. На дебатата ќе говорат политичари, претставници на здруженија, професори, новинари и аналитичари, од Македонија и странство, кои непосредно или посредно се поврзани со настаните од 2001 година. Настанот ќе се одржи на 20 и 21 јануари (среда и четврток) 2010 година со почеток во 10.00 часот во хотелот „Холидеј Ин“, сала Милениум 1. Дневен ред (.pdf) Прилог кон дневниот ред (.pdf)				ОБЈАВА за набавка на училишен прибор 1 Објавa број: FOSIM/EMGF/10011 UP 2 Финансирање: Фондација Институт отворено општество – Македонија од Соросовиот Ургентен фонд за интервенции насочени кон ублажување на последиците од економската криза 3 Нарачател: Фондација Институт отворено општество - Македонија (ФИООМ) за потребите на проектот Помош во образование на сиромашни 4 Корисници на опремата: Ученици од I-VIII одделение во основно образование Комплетната објава Комплетна документација за набавка на училишен прибор - ЗА ПОПОЛНУВАЊЕ Комплетна документација за набавка на училишен прибор - ЗА ПЕЧАТЕЊЕ Дистрибутивна листа
ПРОГРАМА ЗА РЕФОРМА НА ЈАВНАТА АДМИНИСТРАЦИЈА Државните институции не се транспарентни и отчетни за трошењето на јавните пари Центарот за граѓански комуникации денеска го презентираше четвртиот квартален Извештај за резултатите од мониторингот на процесот на јавни набавки, кој покрај редовната анализа на постапките за јавни набавки, содржи и анализа на правната заштита во постапките за јавни набавки. Во извештајот, меѓу другото, се констатира: • Наспроти законската обврска, некои државни институции, меѓу кои и министерства, во текот на 2009 година не доставиле ниту едно известување за склучен договор за јавна набавка до Бирото за јавни набавки. • Се зголемува бројот на државни институции кои до Бирото за јавни набавки не доставуваат податоци за направените трошења до 20.000 евра за набавка на стоки и услуги, односно до 50.000 евра за набавка на работи. • Се продлабочува проблемот со одолговлекување на донесувањето на одлуката за избор на најповолна понуда. Од вкупно 40 мониторирани постапки за јавни набавки во овој квартал, одлука за избор на најповолна понуда не е донесена во дури 13 случаи (33%), а временското одолговлекување на донесување одлука во овие постапки се движи од 50 до 120 дена. • Се ублажува проблемот со поништување на постапките за јавни набавки. Од мониторираните 40 постапки за јавни набавки, целосно или делумно се поништени 7 постапки или 17,5%, што претставува извесно ублажување на овој проблем во однос на претходниот квартал, кога беа поништени 25% од постапките. • Иако зголемено, користењето на електронскиот систем за јавни набавки во последниот квартал од 2009 година сè уште не е на задоволително ниво. Во 2009 година, преку Електронскиот систем за јавни набавки се спроведени само 2,5% од постапките, со што се доведува во прашање подготвеноста за остварување на законската обврска – од идната година, уделот на електронските аукции да изнесува 30% од вкупната вредност на јавните набавки. • Пораст на бројот на жалби по јавни набавки од страна на фирмите во последните 6 месеци. Економските оператори (фирмите) сè почесто ги оспоруваат одлуките за избор на најповолен понудувач на договорните органи (државните институции). Притоа, ДКЖЈН сè почесто ги уважува жалбите, односно ги наоѓа за основани (се уважува секоја четврта жалба). Ова укажува на фактот дека договорните органи сè повеќе ги прекршуваат законските одредби, односно прават грешки во постапките. Прочитајте повеќе >>>				ПРЕС-КОНФЕРЕНЦИЈА Власта не смее да го замолчи граѓанското општество НВО Инфоцентарот, Македонскиот центар за европско образование (МЦЕО) и Фондацијата Институт отворено општество Македонија (ФИООМ), на прес-конференцијата одржана денеска, 28 декември 2009 година, најостро го осудија обидот на владејачкото мнозинство да го замолчи граѓанското општество, како и инструментите со кои се служи за да го дискфалификува легитимното право и обврска на граѓаните да ја следат и оценуваат работата на секоја власт. НВО Инфоцентарот, МЦЕО и ФИООМ, на последната седница на Националниот совет за евроинтеграции (НСЕИ) беа изложени на неосновани жестоки напади и етикетирања од страна на пратениците на владејачката ВМРО-ДПМНЕ, членови на Советот, а притоа ни беше одземено и правото да ги изнесеме нашите факти, аргументи и ставови. Прочитајте повеќе >>>
Стечајците добија 50 кебиња Стечајните работници кои штрајкуваат со глад во Куманово денеска ги посетија претставници од Институтот отворено општество Македонија и им донесоа 50 кебиња. „Работниците потенцираа дека им е студено и сметавме и дека на оние кои штрајкуваат со глад не мора и да им студи.Треба да се искаже човечка солидарност секогаш и затоа ако е потребно ќе донесеме лекови кои не се на листата, а ќе организираме и бесплатна правна помош за стечајците.Мислам дека државните институции не можат да останат глуви на штрајкот особено што не се работи за толку голем и несовладлив финасиски залак за да се овозможи овие луѓе да си ги оставарат правата“ - вели Владимир Милчин. Тој смета дека е егоистична и алчна нашата власт кога не сака да го реши проблемот на социјално најниската категорија на луѓе. Стечајците штрајкуваат веќе 12 дена и досега никој од власта не ги посетил. Постојано се под лекарства поради нарушеното здравје, но велат дека нема да се откажат од штрајкот се додека не се реши нивното прашање. Извор: KumanovoNews.com				ЛАГИ, ИНСИНУАЦИИ И ПОДБУЦНУВАЊА Главниот и одговорен уредник на „Вечер“ Драган Павловиќ Латас, претендент на позицијата водечки погромаш во Република Македонија, уште еднаш го урниса својот весник на рамниште на политичка депонија кога на 18 декември објави непотпишан текст со небулозен наслов „Грција ги плаќа нивните, а во Македонија своите новинари за да помине грчкиот предлог“. Непотпишаниот текст врие од лаги и инсинуации. Барајќи жртвени јарци и произведувајќи државни непријатели, „македонољубецот“ набрзина скрпил некаков список, небаре „Латасова листа“ на новинари кои, инсинуира тој, биле „платени да помогнат да помине грчкиот предлог за рушење на македонизмот“. Петнаесетте имиња на „платените новинари“, признава тој, ги нашол на сајтот на Сорос, проект Граѓани за европска Македонија. „Рушителите на македонизмот“ се објавиле со име и презиме на сајтот на Фондацијата Институт отворено општество – Македонија, во проектот Граѓани за европска Македонија?! А кои се, всушност, тие петнаесет „платени новинари“? Седуммина од нив не се новинари. А меѓу нив има и такви кои никогаш ниту напишале ниту кажале во некаков медиум нешто за спорот околу името. На Латас тоа не му е непознато, но тој безобѕирно лаже кога сака да ја постигне нормата, кога „штанца“ непријатели и поттикнува путинофилија затскриен зад божемното македонољубие. Граѓаните за европска Македонија организираа 24 дебати во 19 градови во Република Македонија. Шеснаесет воведничари и стотина дискутанти учествуваа во тие дебати. Во името на Фондацијата Институт отворено општество – Македонија и со полна кривична и материјална одговорност, јас, како извршен директор на ФИООМ тврдам дека ниту еден воведничар или дискутант не добил ни денар хонорар. Претпоставувам дека на Латас и неговите налогодавци ова може да им звучи неверојатно, но тоа е така! Членувањето во ГЕМ и учеството во активностите на ГЕМ е граѓанско, доброволно и не овозможува никакви приходи, редовни или повремени! Ова не го тврдам прв пат и ќе го повторувам секогаш кога ќе треба да се подзачистат отровните испарувања што ги шират депониите командувани од Латас. Значи, да подвлечеме црта под лагите и инсинуациите објавени во „Вечер“ на 18 декември 2009 година. Прво, половината од петнаесетмината „платени новинари“ не се новинари. Второ, ниту еден од нив не е платен! Тоа се фактите и тука не помагаат никакви латасовштини. Доколку петнаесеттемина граѓани одлучат да го тужат клеветникот, ФИООМ ќе им обезбеди правен застапник. За Фондацијата Институт отворено општество – Македонија, Владимир Милчин, Извршен директор
СООПШТЕНИЕ Творецот на Законот за слободен пристап до информации од јавен карактер самиот не го почитува законот и не доставува информации од јавен карактер По три и пол години од почетокот на имплементација на Законот, се наоѓаме во една зачудувачка ситуација кога Министерството за правда, кое е творец на истиот закон, не постапува по барањата за слободен пристап до информации од јавен карактер. Имено, Македонското здружение на млади правници, за потребите на својот проект „Поддршка на основање на системот на бесплатна правна помош во РМ“, до подрачните одделенија на Министерството за правда, во текот на месец септември оваа година, поднесе барања за информации од јавен карактер со прашања за капацитетот со кој располагаат подрачните одделенија во пружање на бесплатна правна помош, односно за бројот на вработени правници во подрачните одделенија и бројот на правниците меѓу нив кои имаат положено правосуден испит. Со оглед на тоа дека надлежно за давање на информациите е Министерството за правда, барањата се препратени до Министерството, кое до ден денес ги нема доставено бараните информации. Сметаме дека е потребно да напоменеме дека бараните информации се од големо значење за Здружението од причина што истото, покрај следење на процесот на основање на системот на бесплатна правна помош, изготвува и анализи и коментари на предлог законот со кои учествува на расправите по предлог законот, а се со цел за придонесување кон донесување на квалитетен Закон за бесплатна правна помош. Ваквото однесување на Министерството за правда е крајно несериозно и без било какво оправдување, особено што постапката за носење на Законот за бесплатна правна помош е во тек, па се добива впечаток дека Министерството за правда само за да избегне било какви евентуални критики, одбива да ги достави бараните информации. Во таа насока, и Комисијата за заштита на правото за слободен пристап до информации од јавен карактер, во своите решенија укажува дека „...неспроведување на одредбите од Законот од страна на имателите по три и пол годишна примена нема никакво оправдување, особено не за институции како подрачните одделенија, кои се во состав на Министерството за правда, кое пак, беше предлагач на Законот. Ова е уште повеќе недопуштено доколку се има во вид дека во состав на Министерството за правда функционира Државниот управен инспекторат, чија надлежност е да врши управна инспекција. ....Оттука, недопуштено е институција која го предложила наведениот Закон и која има обврска да врши надзор над неговото спроведување, истата да не го применува.“				СООПШТЕНИЕ Учеството на еден скопјанец или скопјанка во процесот на носење одлуки кои ги менуваат ликот и содржината на Скопје очигледно функционира поинаку кај нас, во нашата демократија! Тоа зависи од некомуникацијата помеѓу надлежните, законските недоискажаности, како и недруштвеноста на г-динот Владимир Здравев, тромоста на г-динот Маневски, и духовитоста на г-динот Тодоровиќ. Општинските советници изгласани од граѓаните на Oпштина Центар како да не постојат! Институционалното попречување на нашата иницијатива за референдум е само дел од системски диригираното задушување на поинаквиот став, кое се демонстрираше и со натрапничко однесување на нашите трибини, игнорирањето на нашите апели за јавна дебата, насилниот прекин на протестот на Плоштад Македонија, игнорирањето на анкетите на јавно мислење и на потписите собрани за започнување на граѓанска иницијатива. Поднесувавме барања, праќавме писма, пеевме песни, дебатиравме, нè навредуваа, нè маткаа по шалтери и разни канцеларии. Бевме трпеливи и соработливи, направивме сè што побараа, сè што „според законот“ сме требале да го направиме. Ги прифаќавме сите новонастанати услови во процесот и ги исполнувавме навреме. Конечно, Претседателот на Советот на Oпштина Центар, лично ја прифати иницијативата, иако тој, според законот, требал да закаже седница на Советот! А секако дека Министерството за правда не го прифаќа нашето барање без заклучок од несудената седница... Граѓаните на неброени начини го искажаа своето незадоволство од одлуката за изградба на црква и џамија на плоштадот Македонија, а нивните гласови останаа игнорирани. Дотолку повеќе, се искористија да се обележат и демонизираат иницијаторите, поради нивните ставови. И тоа не е најстрашниот дел! Симптоматичен е начинот на кој активистите „се стимулираат“ да се откажат од иницијативата: со прекршочни пријави, лични закани, јавна осуда, дури и физичка сила пред очите и пендраците на полицијата. Повиканите на ниеден начин не се почувствуваа повикани да поддржат иницијатива која ќе овозможи нашиот став конечно да добие и своја институционална форма – граѓаните на референдум да се изјаснат дали сакаат цркви, џамии и други верски објекти на главниот плоштад во нивниот град. Добивме рок, но не и упатства, услови, простории и поддршка. Добивме лаги, невкус и осуда, но не и право на нашиот град. Затоа, притисокот нема да престане. Ставот постојано ќе добива нови форми, но содржината ќе остане иста. Ќе се санкционира игнорантното и репресивно однесување кое нè кочи, но не и заплашува! Овој пат нè одвратија од намерата да практикуваме демократија тука, непосредно меѓу нас. Иако институциите се должни да им помогнат на граѓаните во практикувањето демократија, тие сепак не направија ништо. Едноставно нè натераа да се повлечеме од идејата дека како граѓани, независно, можеме да иницираме референдум. Но борбата не престанува, иако понекогаш изгледа невозоможно да се победи. Ќе најдеме нови начини како да се спротивставиме и ќе продолжиме.
ПРОМОЦИЈА НА „ВОДИЧОТ ЗА МК@EU“ Алатка за истражувачко и аналитичко следење на процесот на пристапување во Европската унија НВО Инфоцентарот, во соработка со Македонскиот центар за европско образование (МЦЕО) и Фондацијата Институт отворено општество Македонија (ФИООМ), денеска ја промовираше алатката за новинари „Водич за МК@EU“. „Водичот за МК@EU“ претставува алатка за истражувачко и аналитичко следење на процесот на пристапување во Европската унија, односно реформите што ги спроведува Владата. Со цел да се подигне нивото на дебата за европските прашања овој Водич на едно место ги сумблимира сите информации кои ќе им помогнат на новинарите полесно да ги следат и анализираат релевантните стратегиски документи кои го трасираат патот кон ЕУ. За НВО Инфоцентарот и МЦЕО, Европската унија не е „надворешна политика“, туку „внатрешна политика“ бидејќи ги опфаќа сите општествени области односно процесот на пристапување во ЕУ нуди одржлива рамка за спроведување реформи кои ќе обезбедат модерен и демократски систем за креирање политики во сите сфери на општественото живеење. Водичот е организиран во три дела. Во првиот дел е брошурата „За што ќе преговараме?“, каде се објаснети сите 35 поглавја за кои ќе преговара Македонија, односно објаснува како е организирано секое поглавје, и кои прашања и секторски политики влегуваат во неговиот домен. Вториот дел е компаративен преглед на приоритетите и обврските на Република Македонија: пристапното партнерство, проблемите нотирани во Извештаите на Европската комисија во 2008 и 2009 година, мерките и роковите предвидени од Владата во Националната програма за преземање на европското законодавство и сите проекти кои треба да придонесат за побрзо спроведување на реформите во даденото поглавје кои ќе се финансираат преку ИПА. Третиот дел содржи контакти на националните институции и тела надлежни за спроведување на процесот, организирани по поглавја. Водичот е изработен во рамките на проектот „Време е за ЕУ!“, финансиски поддржан од Фондацијата Институт отворено општество Македонија (ФИООМ) и Проектот за зајакнување на граѓанското општество, на Агенцијата на Соединетите Американски Држави за меѓународен развој (УСАИД) и спроведуван од Институт за трајни заедници (ИТЗ).				СООПШТЕНИЕ Пет причини зошто Македонија треба да ги почне преговорите Македонскиот центар за европско образование (МЦЕО) и Фондацијата Институт отворено општество – Македонија (ФИООМ) денеска, на 2 декември, организираа прес-конференција за да ја запознаат јавноста со новиот policy brief под наслов „Лисабон – Скопје – Солун: Европа се враќа дома; Пет причини зошто Македонија треба да ги почне преговорите“. Со овој документ сакаме да истакнеме пет причини зошто Македонија треба да добие датум почеток на преговори и тоа: 1) Европската комисија даде препорака за започнување на пристапни приговори, а врз основа на исполнувањето на зададените репери; 2) Билатералните спорови не се дел од пакетот за преговори; 3) Да се задржи позитивниот моментум од 2009 година; 4) Без Македонија, ЕУ не може да докаже дека има кредибилитет да биде глобален играч; 5) Датум за Македонија отвора можност ЕУ да ја „воскресне“ Солунската агенда и проширувањето, а со тоа и дава можност на Грција да си ја оствари својата амбиција - Западен Балкан да стане дел од ЕУ за време на Грчкото претседателство во 2014. Целта на овој policy brief е да допре и кај политичката и кај стручната јавност во државите-членки на ЕУ. Овој документ е дистрибуиран до: Постојаните мисии во Брисел, Министрите за надворешни работи и амбасадите на државите-членки во Република Македонија, Мисијата на ЕУ во Македонија, пратениците во Европскиот парламент, Мисијата на Македонија во Брисел и до сите релевантни медиуми во ЕУ. Датум за Македонија (.pdf)
ДЕКЛАРАЦИЈА Растројството не може да биде устројство! Одново зачестија вербалните напади врз оние кои јавно изнесуваат политички идеи различни од политиките на власта. Ова станува хронично и загрижувачко. Секое струполување на македонските позиции на меѓународен план актуелната власт се обидува да го амортизира однатре поттикнувајќи лов на вештерки, предавници и внатрешни непријатели. Пред две недели, владејачката партија на еден докрај небулозен начин жигоса неколкумина граѓани, главно од граѓанскиот сектор, обвинувајќи ги дека биле „на платниот список“ на некогашниот претседател и сегашен водач на опозицијата. Неколку дена потоа, „еден од столбовите на македонската држава“ (како што актуелната власт сака да ја гледа МПц), архиепископот Стефан, ги нападна граѓаните кои се противставуваат на изградбата на верски објекти на скопскиот плоштад етикетирајќи ги како „егзарси“ и „анкетари“ кои работат за нечии туѓи интереси. Пред три недели, еден од најбруталните извршители на режимот, уредник на телевизија и весник, со невиден простотилак и агресивност им се нафрли (во прв ред како на „педери“) на тројца активисти од невладиниот сектор, со своето бладање кршејќи ги сите можни етички и професионални норми. На истата телевизија, луѓето кои мислат спротивно од власта беа наречени „квазиинтелектуалци, платени новинари, сепаратисти, платеници на разни служби, обесправени албанци“... а „совесните интелектуалци, добрите новинари, лојалните албанци и невладините организации кои имаат државотворен капацитет“ беа повикани да им се противстават на првите. Целиот документ на македонски јазик (.pdf) Целиот документ на албански јазик (.pdf) Целиот документ на англиски јазик (.pdf)				ПРОГРАМА ФОРУМИ ВО ЗАЕДНИЦАТА Струмичани гласаа за Отворен амфитеатар - летна сцена „Изградба на отворен амфитеатар - летна сцена“, проект во рамки на општинската програма Културни манифестации, доби најголем број гласови на петтата форумска сесија, што на 20 ноември се одржа во Домот на АРМ во Струмица, во присуство на 100 жители. Избраниот проект едногласно беше изгласан од Струмичани да биде финансиран со 6.900.000 денари, од кои 4.000.000 се донација од Швајцарската агенција за развој и соработка (SDC) и останатите од буџетот на општината. “Амфитеатарот ќе биде на располагање на сите граѓани, млади, НВО и други, и се очекува да биде готов при крај на наредното лето“, изјави на сесијата градоначалникот на Струмица Зоран Заев. Тој додаде дека се надева оти сите проекти ќе бидат реализирани во рамките на буџетот на општината. Присутните на буџетскиот форум, структуирани во девет работни маси, гласаа за седум проекти во рамки на развојните програми на општината, за кои дебатираа во изминатите два месеци. Тоа се: „Поплочување на Леблебиџиската улица“, „Набавка и поставување на знаци и табли со имиња на улици и улични броеви на сите колективни и индивидуални станбени згради“, „Изградба на дел од ободен канал“, „Изградба на отворен амфитеатар - летна сцена“, „Канализација во с.Муртино“, „Канализација во с.Костурино“ и „Реконструкција на водовод во с.Банско“. “Добро водениот процес може да доведе до добар резултат, но подеднакво е важно и учеството во процесот“, изјави Владимир Милчин, извршниот директор на ФИООМ, организацијата што ја спроведува Програмата во Струмица. Тој се надева дека реализацијата на проектот ќе биде брза, а форумскиот процес ќе биде дел од праксата на општина Струмица. На сесијата беа преразгледани и 10-те предлози на граѓаните до општинската администрација од минатата сесија, кои во вид на предлози или препораки, ќе се достават до локалната самоуправа.
ТРКАЛЕЗНА МАСА Предизвиците во пресрет на донесувањето на Законот за бесплатна правна помош Фондацијата Институт отворено општество – Македонија (ФИООМ), во соработка со Проектот за поддршка на човековите права и Македонското здружение на млади правници, на 20ти ноември 2009 година, организираше тркалезна маса на тема „Предизвиците во пресрет на донесувањето на Законот за бесплатна правна помош“. Тркалезната маса имаше за цел, во периодот помеѓу двете читања на Предлог - законот за бесплатна правна помош во Собранието на РМ, пред поширокиот аудиториум на јавноста да се направи презентација на решенијата на Предлог - законот, како и да се споделат компаративни искуства на ниво на Советот на Европа и државите членки на Евроспката Унија во поглед на примената на бесплатната правна помош и пристапот до правдата. Значењето на донесувањето на квалитетен закон за бесплатна правна помош и посветеноста на ФИООМ кон давање придонес во насока на подобрување на законските текстови со кои Република Македонија го приближува своето законодавство со законодавството на ЕУ, беше потенцирано од страна на Владимир Милчин при отворањето на споменатата тркалезна маса. Осврт на решенијата опфатени со Предлог – законот за бесплатна правна помош даде заменик министерот за правда, г-дин Ибрахим Ибрахими, додека поранешната судика во Европскиот суд за човекови права, г-ѓа Маргарита Цаца Николовска, даде осврт на правото на пристап до правдата согласно Европската конвенција за човекови права. Европските искуства во поглед на примената на бесплатната правна помош и предизвиците пред кои Словачка се нашла при имплементацијата на словачкиот Закон за бесплатна правна помош, ги пренесе г-ѓа Марија Коликова, адвокат и поранешен директор на Центарот на правна помош при Министерството за правда на Словачка. Прочитајте повеќе >>>				ДЕБАТА: ПРИТИСОЦИТЕ ВРЗ СЛОБОДАТА НА ИЗРАЗУВАЊЕ Акција наместо конформизам и апатија Денеска, 19 ноември 2009 година, во Скопје, во организација на граѓанската иницијатива „Граѓани за Eвропска Македонија“, се одржа дебатата „Притисоците врз слободата на изразување“. На дебатата на која учествуваа новинари, аналитичари и граѓански активисти се дискутираше за актуелните состојби во македонската медиумска сцена, за притисоците врз остварување на правото на слободно изразување и за се почестото користење на говорот на омраза. Учесниците нагласија дека и медиумите и новинарите се под константен притисок од политичарите и дека владините реклами се дел од процесот кој ги корумпира медиумите. Генерално, новинарите или одбиваат да ја прифатат реалноста, па молчат, или свесно стануваат политички агитатори. Во вакви услови, во медиумите постои цензура, а кај новинарите владее автоцензура. За дел од учесниците на дебатата, во моментов, македонското новинарство е „мртво море“ со кое владее ПР-пропагандата. Претставниците од македонската граѓанска сцена сметаат дека граѓанскиот активизам е стерилизиран благодарение на владеечкиот демо-христијански конзервативизам, капитализмот, консумеризмот и остатоците од комунизмот. Етикетирањето и нескриениот говор на омразата, за чие што користење во Македонија не постои соодветна законска регулатива, се оружјето кое власта ги користи за замолчување на новинарите и граѓаните. Граѓанскиот сектор и медиумите не смеат повеќе да се ограничуваат на реакција, туку треба отворено да прозборат и да се борат против методите на замолчување. На дебатата беше најавено и изготвувањето на тн. „Црна книга на срамот“ во која ќе се забележат сите јавни изблици на тоталитаризам, вербално насилство, говор на омраза и сл.
СООПШТЕНИЕ Граѓани за Европска Македонија На 12.11.2009 Претседателот на Советот на општина Центар нè извести дека ја прифаќа нашата предлог иницијатива и дека собирањето на потребните 20% потписи од полнолетни жители на Oпштина Центар започнува истиот ден. При тоа Претседателот на Советот, намерно или ненамерно, не наведува пред кој државен орган треба да се собираат потписите, каде, односно во чии простории и кога. Вчера, на 16.11.2009 во подрачната единица на Министерството за правда во Општина Центар, немаше отворен образец за собирање потписи за распишување задолжителен рефрендум на кој граѓанките и граѓаните би го кажале својот став за градењето верски објекти на Плоштадот Македонија. Ние како иницијатори, неколку пати до сега укажувавме дека во вакви услови е теоретски и практично невозможно да се спроведе една ваква граѓанска иницијатива: 1. Ни потрошија 6 од 30 дена за собирање потписи заради нивната неажурност и некоординираност. Веќе е јасно дека со недавањето соодветни и навремени информации намерно ја саботираат оваа иницијатива бидејќи се плашат од исходот; 2. Институциите навремено да си ја завршеа работата и да го префрлеа избирачкиот список во ДИК сега немаше да дискутираме за простории, време и фер услови за спроведување граѓански иницијативи. Жртва сме (граѓанската иницијатива) на маѓепсан триаголник на неодговорноста меѓу ДИК, Министерство за правда и Советот на Oпштина Центар. Граѓаните не се должни да ги координираат институциите, а најчесто се изложени на озлогласената административна стратегија пинг-понг од шалтер до шалтер; 3. Физички е невозможно во 30 дена од кои само 20 работни, во работно време да се соберат 8.800 потписи. Во Македонија е полесно да се соберат потписи за државен референдум и за кандидатура за претседател отколку за локален референдум. Законот за референдум не само што е лошо напишан (нејасен, недовршен, нелогичен, неусогласен со други закони, неусогласеност на локално и национално ниво) тој е и тешко применлив и целосно зависи од вољата на администрацијата 4. ВМРО-НП имаат 3 месеци и 33 канцеларии за собирање 10.000 потписи, Министерот за правда преку телевизии ги информира за процедурата и се потпишуваат без лични карти; 5. Доколку Советот го следеше автентичното толкување за собирање на иницијалните 100 потписи за Предлог иницијатива на државно ниво, го прашуваме зошто не ја следи практиката на спроведување на иницијативи на државно ниво во делот на обезбедување услови за собирање потписи пред да започне самото официјално собирање на потписи? 6. Во Македонија може да функционираат само октроирани референдуми. Кога Премиерот сака референдум - си го добива, кога граѓаните сакаат - тогаш не може. Повторно се зависи од партиската воља; Бараме институциите да ни излезат во пресрет и да отворат повеќе собирни пунктови во урбаните заедници низ општината кои ќе работат после 16 часот, исто така бараме рокот од 30 дена да се брои почнувајќи од денот кога ќе бидат обезбедени сите услови, сè со цел остварување на фундаменталното демократско право за учество на граѓаните во донесувањето на одлуките. Со почит, Плоштад Слобода Граѓани за Европска Македонија				Програма Исток Исток: Прекугранични партнерства Конференција Дали бизнис инкубацијата функционира? На 20 ноември 2009 год. на Скопски саем (сала Македонски бизнис центар) Фондацијата Претприемачки сервис за млади и фондацијата Институт отворено општество – Македонија организираат регионална конференција со наслов Дали бизнис инкубацијата функционира? Настанот е дел од регионалниот проект Бизнис инкубатори: Креирање на модел за успешна и поволна средина за локални и регионалн развој кој е поддржан од програмата Исток Исток: Прекугранични партнерства. Целта на еднодневната конференција е презентирање на резултатите од спроведено истражување за моделите и искуствата од функционирање на бизнис инкубаторите како инструмент за стимулирање нови вработувања и поттикнување локален и регионален економски развој. Настанот преставува можност за размена на регионални искуства во креирање политики кои поттикнуваат самовработување кај младата популација и презентирање позитивни искуства во изнаоѓање алтернативни решенија за намалување на невработеноста. Преземете ја програмата за работа
Програма Исток Исток: Прекугранични партнерства Конференција Евроазиска иницијатива за безбедност на пациенти Во периодот 19-21 ноември 2009, во хотел Континентал, Скопје ќе се одржи завршната регионална конференција на Евроазиска иницијатива за безбедност на пациенти. Членови на оваа иницијатива се претставници на НВО секторот и експерти од Азербејџан Албанија, Белорусија, Босна и Херцеговина, Бугарија, Грузија, Ерменија, Казахстан, Киргистан, Литванија, Молдавија, Полска, Руската Федерација, Словенија, Украина и Хрватска. Оваа иницијатива е финансиски поддржана од програмата Исток Исток: Прекугранични партнерства на мрежата на фондациите на ИОО. Целта на настанот е размена на национални и регионални искуства во развивањето механизми за подобрување на јавниот здравствен сектор во чиј центар се правата и безбедностите на пациентите. Настанот ќе биде искористен за размена на искуства во креирањето јавни политики за правата и безбедноста на пациентите и развој на успешни модели во градењето коалиции меѓу преставниците на невладиниот сектор и донесувачите на одлуки во јавните/државните институции на локално и централно ниво. Се очекува влијание на јавната свест за потребата од вклучување на принципите за безбедноста на пациентите при функционирањето на здравствените институции. Во план е и дискусија за механизмите и начините за реализирање долгорочна соработка и прекугранично вмрежување на партнер организациите со цел да се иницирааат застапувачки активности за унапредување на заштита на правата и безбедноста на пациентите. Центарот за регионални истражувања и соработка - Студиорум е домаќин на средбата и партнер во оваа регионална иницијатива. Преземете ја агендата				КОНФЕРЕНЦИЈА Образованието за социјална правда - од обука до реалност Во периодот 13-15 ноември 2009, во хотелот Метропол во Охрид, проектот „Креативна настава и учење“, имплементиран од Фондацијата Институт отворено општество - Македонија, организира Конференција на тема „Образованието за социјална правда - од обука до реалност“. На конференцијата ќе земат учество околу 400 професори од единаесет средни училишта од целата држава, кои во текот на изминатиот период беа учесници на обуките за образование за социјална правда, организирани во рамките на активностите на проектот „Креативна настава и учење“. Секое од овие училишта ќе има можност да ги презентира и да дискутира околу своите искуства од имплементацијата на знаењата стекнати на обуките, а на сите учесници ќе им бидат доделени сертификати за нивното учество.
ГЕМ во Велес Ни треба жесток демократски притисок за влез во ЕУ Проевропската ориентација е најпатриотската опција за Македонија. Ова е еден од заклучоците на минатонеделната трибина, која во организација на граѓанската иницијатива „Граѓани за Eвропска Македонија“, се одржа во Велес, на 6 ноември 2009 година. Бранко Героски, Мерсел Биљали, Никола Гелевски, Владимир Милчин, Жарко Трајаноски и Роберто Беличанец на трибината разговараа со велешани за предизвиците кои ја очекуваат Република Македонија пред декемвриската одлука на Советот на министри на ЕУ. Прашањата за кои се разговараше на трибината, според учесниците, не се прашања кои ги засегаат само политичарите. Напротив, ги засегаат сите граѓани на Република Македонија, па оттаму и потребата граѓаните да демонстрираат нагласено критичко мислење и да конституираат жесток демократски притисок врз Владата, а се со цел побрзо да влеземе во Европската унија. Во време кога се прославуваат 20 години од паѓањето на Берлинскиот ѕид и воспоставувањето на новата европска судбина, Македонија се уште тапка во место и се врти во кругот на лошо владеење, популизам и власт која не сака да преземе одговорност. Распишувањето референдум за името, без отворен и јасен став на власта, за ГЕМ претставува само уште еден начин на власта да манипулира со народот, без да преземе одговорност за прашањата клучни за државата. Учесниците на трибината сметаат дека премиерот Груевски мора да преземе одговорност и да донесе одлука што ќе ни обезбеди европска иднина. Се плашат дека до 7 декември ќе се засилат манупулациите со јавноста и дека оваа власт не е спремна да се откаже од авторитарното владеење. Според нив, на власта не и одговара отворањето на поглавјата за преговори со Унијата, затоа што структурите на ЕУ ќе имаат поголемо влијание врз случувањата во државата.				КОНФЕРЕНЦИЈА Зголемување на финансиската и управувачката автономија на месната самоуправа Во организација на ФИООМ, во петокот, 6 ноември 2009, во Скопје се одржа конференција на тема “Зголемување на финансиската и управувачка автономија на месната самоуправа“ на која беа презентирани наодите и искуствата стекнати преку истоимениот проект, имплементиран во Општина Крушево. Учесниците на конференцијата, Никола Јовановски, Претседател на Советот на општина Крушево, Демирша Емини-Дава, советник во општина Крушево и претседател на советот на МЗ Јакреново, Гоце Кически, советник во Општина Крушево и член на Советот на МЗ Бучин, , Фани Каранфилова-Пановска од Фондацијата Институт отворено општество - Македонија Ирина Фајон, од Иницијативата за реформа на јавната администрација и локалната самоуправа од Будимпешта, Томе Шеќерџиев и Јадранка Кунгуловска, консултанти за локална самоуправа и Војтек Марчлевски, меѓународен консултант за локална самоуправа, ги презентираа состојбите на месната самоуправа (МС) во Република Македонија како и споредбеното искуство за управување на Месната самоуправа во Полска. Целта на овој проект е зголемување на финансиската и управувачката автономија на месната самоуправа како и подигнување на капацитетите на месните заедници за нивно зголемено учество во донесувањето одлуки на локално ниво, оспособување за самостојно определување на локалните приоритети и нивна имплементација, како и подобрување на комуникацијата и институционалната поставеност со општината.
ГЕМ во Тетово Македонија нема сила за уште едно НЕ Со идеја да ги поттикнат граѓаните да демонстрираат нагласено критичко мислење и да конституираат жесток демократски притисок врз Владата, а се со цел побрзо да влеземе во Европската унија, граѓанската иницијатива „Граѓани за Eвропска Македонија“, минатата недела, на 30 октомври 2009 година, во салата на општина Тетово, организираше трибина на која се разговараше за предизвиците на Република Македонија, пред декемвриската одлука на Советот на министри на ЕУ, за датумот за почеток на преговори. На трибината, до тетовчани се обратија Бранко Героски, Мерсел Биљали, Никола Гелевски, Владимир Милчин, Жарко Трајаноски и Роберто Беличанец. Осврнувајќи се на октомврискиот Извештај на Европската комисија и добиената препорака за започнување преговори со ЕУ, Героски нагласи дека крајниот рок за решавањето на спорот со името, засега најголемата пречка да не добиеме датум, ни истекува во декември 2009. Героски констатираше дека проевропските сили во Македонија ќе мора да го поддржат премиерот Груевски, но единствено доколку направи компромис за името и го реши отвореното прашање со Грција. За Мерсел Биљали, одолговлекувањето на решавањето на спорот со името и трите години поминати во чекање на препораката од ЕК се неповратна загуба за Македонија, чиј влез во ЕУ и НАТО е од круцијален интерес. Биљали упати предупредување кон Владата, за која се сомнева дека веќе и отворено ги контролира медиумите. „Опасноста е дека тоталната контрола врз умот може лесно да се претвори во неконтрола врз безумието“. Никола Гелевски потсети дека граѓанското општество, во моменти од историско значење за државата, мора де се обедини, да изврши конструктивен притисок врз Владата, да се организира на нов, креативен начин и од оваа Влада да побара повеќе. Роберто Беличанец изрази отворена недоверба дека до декември ќе се решат клучните прашања. Тој смета дека нашата голгота ќе продолжи заради недемократската владејачка структура. Според него, Груевски ќе се обиде со референдум да направи соучесник од народот. Сличен став изрази и Жарко Трајаноски кој смета дека Груевски ќе оди на референдум, заради тоа што референдумот го вети во предизборната „Преродба во 100 чекори“. Според него, не постојат законски услови за организирање референдум, не е корегиран избирачкиот список, не постои политички консензус, а дури ни во јавноста нема расположение за гласање на референдум. Владимир Милчин нагласи дека Македонија се наоѓа во полоша позиција, за разлика од позицијата што ја имаше на почетокот на годинава. Според Милчин, доколку не го искористиме овој момент, можеби ќе треба да чекаме во ЕУ да влеземе во пакет со останатите балкански држави. Тој, исто така, истакна дека проевропските сили во Македонија ќе му помогнат на Груевски, но единствено ако отворено го каже својот став и предлогот за името. Присутните тетовци на трибината нагласија дека граѓаните се уморни од политика. Се плашат дека референдумот одново етнички ќе ја подели Македонија.				Медиумско огледало - Архива Архива на Медиумско огледало
Архива 2009 Архива на настани и новости 2009				Архива 2008 Архива на настани и новости 2008
Архива 2007 Архива на настани и новости 2007				Архива 2006 Архива на настани и новости 2006
Архива 2005 Архива на настани и новости 2005				Архива 2004 Архива на настани и новости 2004